27 Julie 2013 ~ 10 Kommentare

Malema en Suid-Afrika se gegriefde jeug

Geskryf deur Ebert Terblanche

South Africa have use a butter (sic) trading on buying a crude oil, to avoid often raises on Petrol price.EFF op Facebook

We mean; we have to use our own mineral resources like Gold and Platinum to buy a crude oil, rather than using our currency.

Viva EFF for this, Vivaaaaassaaa!!!

Aan die woord is Julius Malema, wat klaarblyklik die handelsbeleid van sy te stigte party, die Ekonomiese Vryheidsvegters (EFF) toelig. Die eerste reaksie op hierdie Facebook inskrywing is: “Dis is what we cal a fresh mind of young learders”. Verwys gerus na die foto van die plasing hierlangs.

Om ruilhandel (“barter”, nie “butter” nie) voor te stel as alternatief vir die norm van internasionale handel is nie alleen naïef nie, maar bied ook geen bykomende voordeel nie, want die Rand se waarde word reeds ten nouste gekoppel aan die wêreld se vraag na Suid-Afrika se minerale. Al wat sal gebeur is dat ‘n effektiewe handelsmeganisme vir ‘n oneffektiewe een verruil sal word, wat kostes sal verhoog en presies die teenoorgestelde sal regkry as wat hy beloof.

Tog blyk dit duidelik dat daar ‘n groot vraag na sy retoriek is, soos wat die ondersteuner se reaksie aandui.

In ‘n onlangse rubriek in Beeld skryf Jan-Jan Joubert “Die EFF is sekerlik tot dusver die interessantste en gevaarlikste nuwe rolspeler op die politieke verhoog in die aanloop tot volgende jaar se algemene verkiesing.”

Jan-Jan beaam Eugene Brink van Solidariteit se vroeëre mening dat befondsing vir die EFF ‘n baie groot struikelblok is.

Die voorlopige indruk wat ek kry is dat die EFF besig is om aansienlike steun te monster. In die eerste paar weke nadat hulle hul amptelike Facebookblad opgestel het, het hulle ongeveer 1,000 volgers per week bymekaargemaak, maar na ‘n paar weke het hul blad sowat 1,000 nuwe volgers per dag gekry, en het hulle na 6 weke die 30,000 kerf verbygesteek.

Om hierdie getal in perspektief te stel, word dit in die grafiek hieronder vergelyk (ten tye van skrywe) met die aantal volgers van organisasies wat langer reeds ‘n profiel op Facebook handhaaf en meer bemarkingsfondse het:FB per organisasie

Teen middel Augustus behoort die EFF die ANC verbygesteek het met Facebookvolgers indien hulle die huidige astronomiese groei volhou. Indien elke volger R10 per maand aan die EFF bewillig, behoort verkiesingsbefondsing nie so ‘n groot kopseer vir hulle te wees nie.

Facebook verteenwoordig wel nie ‘n stembus nie, maar die tendens word verder bevestig deur ‘n meningspeiling wat in die Sowetan gepubliseer is. Daarvolgens beplan een uit vier jong Suid-Afrikaners om vir die EFF te stem. Die steekproef in die peiling is verteenwoordigend van alle rasse, met 30% van die swart jeug wat beplan om vir die EFF te stem. Dit vergelyk met 35% van die steekproef wat beplan om vir die ANC te stem, terwyl slegs 15% beplan om vir die DA te stem.

Die EFF se stelling dat hulle van plan is om die DA as amptelike opposisie te vervang lyk, ten minste wat die jeug jonger as 35 betref, nie te vergesog nie.

Frans Cronje van die Instituut vir Rasseverhoudinge (SAIRV) beskou die EFF as ‘n simptoom van die armoede, werkloosheid, uitsigloosheid en ontevredenheid wat hoogty vier onder Suid-Afrika se jeug. Dit is te verstane, want 40% van Suid-Afrikaners onder 40 is werkloos, terwyl hulle elke dag sien (in winkels en in die media) hoe ander in weelde leef. Hy waarsku dat ons onsself maar moet voorberei op iemand wat hierdie boodskap bring, want as dit nie Malema is nie, sal iemand anders gereed staan om dit te doen.

Wat is die EFF se boodskap? Dit is maklik om Malema by die agterdeur uit te gooi op grond van sy houtwerkpunt en wanbegrip van handelsbeleid. My oorsigtelike ondersoek na die EFF dui egter aan dat Floyd Shivambu, Malema se grootste politieke bondgenoot in die ANC jeugliga, die breinkrag van die beweging is.

Shivambu is ‘n gegradueerde in Politieke Wetenskap aan Wits en was ook studenteraadsvoorsitter tydens sy studies daar. Hy is ‘n groot aanhanger van die omstrede (maar tog aangeskrewe) Cambridge ekonomie-professor Ha-joon Chang, veral sy boek “Rethinking development economics”, wat Shivambu graag aanbeveel.

Chang argumenteer dat staatsinmenging in die ekonomie nodig is vir ‘n suksesvolle ontwikkelingsekonomie of ontwikkelende staat. Hierdie teorie is nie uit die lug gegryp nie, maar is gegrond op sy ervarings as jong Suid-Korean. Suid-Korea se ekonomie is een van die sogenaamde Asiatiese Tiere en daarmee een van die ekonomiese wonders van die afgelope halfeeu wat ontwikkeling betref. Chang het self ook ‘n artikel neergepen met raad vir die ekonomiese ontwikkeling van Suid-Afrika, waarin hy die nasionalisering van die banke aanmoedig.

Chang se gedagtelyn (hoewel nie kommunisties nie, maar uiters proteksionisties of ekonomies-nasionalisties), word soos manna uit die hemel opgeraap deur die EFF wat die nasionalisering van banke, myne en grond sonder vergoeding as hul ekonomiese panaseë najaag. Die kulturele verskille tussen Suid-Afrika en Korea, asook die vermenging met Marxisme, laat egter groot vrae of die EFF se beleid op enige iets anders as hongersnood en algehele armlastigheid kan uitloop.

Die EFF se groot aantrekkingskrag is myns insiens nie soseer hul beleid, as hul akkurate beskrywing van die ANC se mislukkings nie. Van onderwys, werkloosheid tot mediese dienste, druk die EFF die vinger op die ANC se seerplekke en dráái hulle. So, byvoorbeeld, het hulle die retoriese vraag gevra waarom pres. Mandela in ‘n privaat hospitaal behandel word en nie in die Chris Hani Baragwanath (soos arm swartes) nie. ‘n Tweede voorbeeld is waar Shivambu skryf dat die ANC nie eenvoudig kan voortgaan om Apartheid te blameer vir sy eie mislukkings nie. Daardeur kan hulle moontlik elkeen met ‘n grief teen die ANC, wittes of groot maatskappye in hulle ondersteunerskorps bymekaarmaak.

Floyd Shivambu se verdediging van pres. Mandela as leier van die struggle en uiteensetting van die EFF se plan van aksie wat onlangs in Politicsweb gepubliseer is, bied ‘n boeiende blik op Shivambu en die linkse swart nasionaliste se persepsie van die geskiedenis. Dit is ook die moeite werd om in ag te neem dat Shivambu, anders as Malema, nie kriminele klagte in die gesig staar nie. Hy gaan dus nie maklik van die toneel verdwyn nie.

Wat beteken dit als vir Afrikaners en vir Orania?

Dit is duidelik dat Afrikaners, as vernaamste teiken vir onteiening, die meeste op die spel het om te verloor. Afrikaners het tot op hede hul toevlug by die liberale waardes van die DA gesoek, maar aan die een kant kan die EFF ‘n groter kans hê om die ANC uit die kussings te lig as die DA en aan die ander kant is daar volgens die SAIRV geen beduidende beleidsverskille tussen die DA en die ANC meer oor nie. Daarmee word die politieke toneel al vyandiger.

Dit beteken dat Afrikaners diep sal moet delf op soek na innerlike krag om die veerkragtigheid te ontwikkel om die komende uitdagings die hoof te bied. Voorbereiding is immers altyd beter as voorspelling.

Orania is daarteenoor besig om prakties te demonstreer hoe ‘n ontwikkelingsekonomie gedóén word: met eie instellings, trots op eie werk en die absolute afwesigheid van ‘n afhanklikheidskultuur.

In my volgende bloginskrywing sal ek die soeklig werp op hoe Orania se eie instellings suksesvol verminderde risiko en groter ekonomiese groei bewerkstellig.

Deel/Stuur

10 Reaksies op “Malema en Suid-Afrika se gegriefde jeug”

  1. Anthony Schlemmer 29 Julie 2013 at 07:57 Permalink

    Malema se taktiek het nie vir die jeug in Zimbabwe en elders gewerk nie. Hulle sal moet leer om self te skep en te innoveer.
    Soos die artikel uitwys, tans in Orania plaasvind.

  2. Jacques 29 Julie 2013 at 11:59 Permalink

    Uitstekende samevatting, Ebert. Meer mense moet hierdie artikel lees.

    Net een opmerking oor: “die absolute afwesigheid van ‘n kultuur van geregtigheid.” Is dit dalk ‘n direkte vertaling van ‘entitlement’? Bedoel jy nie ‘aanspraakmakery’ nie? Geregtigheid het tog ‘n baie ander betekenis as ‘entitlement’. Dis nou as ek jou reg verstaan.

    • E Terblanche 29 Julie 2013 at 13:43 Permalink

      Dankie Jacques, jy het die bedoeling reg gelees. Ek het ‘n verandering aangebring. Hopelik is dit nou beter.

  3. Quintin Diederichs 30 Julie 2013 at 06:56 Permalink

    Lekker gelees!

    Ek het ‘n teorie m.b.t. hierdie verwikkelinge. Ons het die ANC al meer as genoeg onderskat en dit het ons baie duur gekos. Ek onderskat hulle lankal nie meer nie. Waarskynlik al drie, maar ten minste een, van die bewegings wat onlangs van die ANC afgestig het (Cope, Agang, EFF) is deur die ANC beplan en word agter die skerms deur hulle befonds en bestuur met die doel om ‘n nuwe amptelike opposissie te skep wat:

    1. die ANC in die saal hou, m.a.w. ‘n opposissieparty wat sterk is, maar net-net nie sterk genoeg nie.
    2. onafhanklike opposissie (bv. DA met hul 16%) se rug breek
    3. vir die wereld te wys dat SA se proporsionele stelsel ‘n sukses is want daar is gereeld nuwe politieke deelnemers wat deur die regerende party “getolereer” word.
    4. aandui dat die ANC se beleid tog nie so sleg is nie, want kyk net wat is die alternatief (in die geval van die EFF)

    Ek kan aan nog ‘n hele paar redes dink, maar ek dink julle kry die idee.

    • Jacques 30 Julie 2013 at 09:01 Permalink

      Quintin, ek dink daar is ‘n daadwerklike kultuur van rebelsheid teenoor swak dienslewering, werkloosheid ens. Veral die jeug wat nie dieselfe lojaliteit teenoor die ANC het as die ouer geslag nie is hier te sprake.
      Ek dink nie hier is ‘n sort sameswering aan die gang nie. Die DA is geen werklike bedreiging vir die ANC nie. Cope is politici wie se beroepsgeleenthede in die ANC tot einde gekom het. Ek vermoed Agang is ‘n ontnugtering onder swart intellektueles en hou net so min gevaar vir die ANC as Cope in.
      Die EFF is ‘n ander storie. Dis die poging van ‘n rebelse jeugleier wie sy hand in die ANC oorspeel het. Hy begin nou begryp dat hy (Malema) ‘n ‘handelsmerk’ in eie reg geraak het en dat hy nie die ANC benodig nie. Enige party wat hy stig sal ‘n outomatiese sukses wees. Hy is ‘n werklike bedreiging vir die ANC en vir die hele land.

      • Lieven 30 Julie 2013 at 10:53 Permalink

        dis so biekie van alby menings en nog meer.Ek geen nou n voorbeeld as die anc nou 36% in Noord transvaal sou kry en EFF 25% wat ons los met 39% vir die ander partye anc-lite(DA) ens, waar gaan die EFF sy steme voeg ? Die senario sal hom oor die hele land versprei.Dit kan meskien selfs ly tot n 2derde meerderheid omdat meer mense sal gaan stem omdat hulle weer iemand het wat hulle in kan glo ….So ja die stigting van EFF is n plus vir die ANC in hul poging om die grondwet te verander

  4. Awie 30 Julie 2013 at 13:52 Permalink

    Malema, hoe dom hy mag klink, skryf of lyk doen een ding reg-hy weet hoe om sy potensiële kieserskorps op te sweep. HY doen wat die arm swarte wil hê. Dis eintlik maar net dieselfde ou storie-beloftes van ekonomiese vryheid-elkeen kry ‘n stukkie grond-die voorheen en tans benadeeldes-die “have nots” kry pasella grond en minerale rykdomme-natuurlik sal dit by die arm swarte wat nie vir homself kan dink/ongeletterd is aanklank vind. Dit is presies wat die ANC in die Freedom Charter belowe het en van die 1950’s in hul sogenaamde “struggle” mos geveg het. Net weereens word die arme swarte by die stembus om die bos gelei met hierdie praatjies. Die “Freedom” wat swartes by die stembus gekry het in 1994, is nou lankal nie meer genoeg nie. Grondroof en rykdomme roof by die sogenaamde ryk wittes, boere en ANC elite is nou die oplossing. Terwyl die ANC verantwoordelik is vir hul eie mense se armoede, maar nou ja, weereens sal daar seker ‘n meerderheid ANC gelowiges maar weer vir hulle stem, ‘n afvallige swart middelklas/opgevoedes vir die DA en dan ‘n groot gros armes vir Malema. Nie die DA, ANC, EFF selfs nie die VF+ het tans die oplossing vir die land se probleme en binne die “westerse” demokrasie as model, is Suid-Afrika steeds besig om agter uit te gaan. Selfs die sogenaamde wit leiers is nie instaat om oortuigend oplossings te bied nie-hulle is maar nog onderdanig aan die huidige sosialistiese demokrasie.

  5. Marius 31 Julie 2013 at 12:00 Permalink

    Ek sou my nie teveel steur aan die aantal mense wat aansluit by die EFF se webblad nie. Baie doen dit uit nuuskierigheid uit omdat die Julius is en emdat dit iets anders is (nuut).

    Ek sou my ook nie teveel steur aan navorsing wat aandui dat 30% van swart jeug aangedui het dat hulle vir die EFF sal stem nie. Kyk eerder na die persentasie jeug wat wel stem en trel dit dan af van die mense wat gesê het dat hulle vir die EFF gaan stem. Dis ‘n geval van 5 paddas wat op ‘n klip sit. Een besluit om in die water te spring. Hoeveel bly oor? Die antwoord is 5, want dit was nog net ‘n besluit wat nog tot uitvoering moet kom.

    Alle politieke partye weet dat daar ‘n liegfaktor is wat in ag geneem moet word met meningsopnames. Dat die EFF baie steun onder die swart werklose jeug gaan kry is ‘n feit, maar of dit in stemme omgesit gaan word is ‘n ander saak. Malema sal ook maar moet leer dat tussen die pap en die mond val die pap op die grond.

    • E Terblanche 31 Julie 2013 at 14:01 Permalink

      Marius, ek gee jou gelyk dat daar baie geraas voor ‘n verkiesing gemaak word wat nie noodwendig in stemme opeindig nie.

      Die een punt waaraan ek wel myself steur, is dat die politieke klimaat vir Afrikaners al vyandiger raak. Anders gestel: Daar is nie ‘n enkele politieke party wat meer as 1% van die stemme gaan trek, wat se beleid bevorderlik is vir die welsyn van die Afrikaners as groep nie.

  6. E Terblanche 18 Augustus 2013 at 10:59 Permalink

    Is die EFF besig om ‘n vennootskap met AMCU (die vakbond wat besig is om die ANC-gesinde NUM te verteer)te bou?

    Hier is ‘n viedeogreep wat deur die EFF geplaas is. Daarin was Malema ‘n spreker by die naweek se herdenking van die Marikana slagting wat deur AMCU gehou is. Oordeel self wat die mense van hom dink:

    http://m.youtube.com/watch?v=ccBpxz9AA8k


Lewer Kommentaar

*