04 Julie 2018 ~ 9 Kommentare

Die mediese dilemma

Geskryf deur Sebastiaan Biehl

In Suid-Afrika, so wil dit voorkom, het jy twee keuses as jy ernstig siek is: of jy gaan dood in ʼn staatshospitaal, of jy gaan bankrot in ʼn privaathospitaal. Ons sit met ʼn tweeklasse-medies: swak, basiese maar gratis gesondheidsorg deur die staat, wat beter is as niks nie maar wat gerig is op die behoeftes van die Derde Wêreld en wat ook toenemend verswak, en state of the art privaatmedies, met hospitale wat lyk soos 5sterhotelle en nog meer as sulkes per nag kos. Laasgenoemde word moontlik gemaak deur mediese skemas met hulle verwarrende hoeveelheid opsies en tariewe. Feit is dat, as jy en jou gesin ten volle medies gedek wil word, dan moet jy ʼn groot deel van jou salaris opdok, iets wat min gemiddelde mense kan doen. Daar is altyd weer nuwe skemas wat die dilemma probeer oplos en wat met heelwat laer premies kliente lok, maar die fynskrif sluit dikwels dit wat werklik nodig is uit.

In Orania is seker die grootste behoefte, volgens die inwoners, medies. Verkieslik ʼn hospitaal met spesialiste, maar ten minste ʼn voltydse dokter met sy praktyk. Die onvoldoende mediese dienste is waarskynlik die grootste enkele rede dat mense weer wegtrek en ander nooit kom nie. Ons sit egter met ʼn hoender-eier situasie. ʼn Mens kan nie ʼn privaathospitaal vir miljoene der miljoene bou vir minder as 2000 mense nie, waarvan ʼn groot deel dit in elk geval nie kan bekostig nie. ʼn Hospitaal net vir Orania-inwoners is nie op hierdie stadium haalbaar nie. Dan praat ons nog nie eers van die wetgewing nie, wat liefs alles rondom medies in die staat se hande wil plaas. Self net ʼn voltydse dokter vir Orania kon nog nie volhoubaar gevestig word nie, om die eenvoudige rede dat die getalle (veral die wat private medies kan bekostig) nog te min is. Tans is hier darem ʼn homeopaat met sy privaatpraktyk, ʼn gratis kliniek met ʼn besoekende dokter wat verskeie kere per week oop is, en ʼn suster met haar eie privaatpraktyk. Medisyne kan per aflewering daagliks gekry word. ’n Staatshospitaal en twee goeie dokters is in Hopetown, sowat ʼn halfuur se ry, en alle ander mediese geriewe is in Kimberley, ʼn uur en ʼn half se ry.

Dit is seker nou nie ʼn troos nie, maar Orania en Suid-Afrika se mediese probleme moet in perspektief gestel word: mense is orals in die wêreld ontevrede met medies, en hoe meer hulle ontvang, hoe groter raak hulle behoeftes. Selfs in Eerste Wêreldlande is mense dikwels kwaad oor die mediese geriewe: die staatsmedies is nie goed genoeg nie, die privaatmedies is te duur en daar is altyd klagtes oor ʼn “tweeklasse-medies”. Dink maar aan die VSA en die hele debakel rondom Obamacare, om van vorige en toekomstige pogings nie eens te praat nie. Ook in ander Westerse lande is dit ʼn gedurige twisappel.

Die feit bly staan dat medies nie net privaat gedoen kan word nie, want dan raak gesondheid ʼn klassekwessie. Dokters het ook ʼn eed tot hulp afgelê en kan nie iemand laat doodgaan omdat die beursie leeg is nie. Net so min is enige staat, nie eers die mees voorspoedige Westerse welsynstaat, in die posisie om die hoogste gehalte medies vir almal te voorsien nie. Hoeveel minder dan nog Suid-Afrika met sy smal basis belastingbetalers en sy hordes armes. Van dokters kan ook nie verwag word om jarelang ten duurste te studeer, om dan teen ʼn hongerloon hulle lewens in gevaar te stel in swak toegeruste staatsklinieke en -hospitale nie.

Feit is ook dat Suid-Afrikaners oor die algemeen talle siektes het. Van dit is oorerflike, kroniese siektes waaraan jy niks kan doen nie, of dit is as gevolg van ongelukke. ʼn Groot deel is egter ook te wyte aan swak leefstylpatrone wat alombekend is maar nog steeds voortgesit word: te veel suiker, te veel alkohol, rook, stres, te veel sit voor die rekenaar of in die motor, te veel rooivleis en stysel, alles doodgekook en doodgebraai, te min vars groente, vrugte en natuurlike voedsel en te min stap en oefening. Natuurlik kan ʼn gesonde leefstyl jou nie van alle siektes bewaar nie, maar dit help. Die wat kla oor onvoldoende mediese dienste (orals in die wêreld) kan solank by hulleself begin en daarmee help om die druk op mediese dienste te verlig. Mediese fondse het maar hulle beperkinge en is net nie vir almal bekostigbaar nie, maar almal behoort iets vir medies weg te sit, selfs die heel armes. Dit is goeie advies om ʼn aparte spaarrekening vir mediese uitgawes te skep waarin die werkgewer ʼn deel van die salaris betaal. In Orania word dit toenemend gedoen en dit skep meer stabiliteit.

Deel/Stuur

9 Reaksies op “Die mediese dilemma”

  1. William Stephens 4 Julie 2018 at 18:05 Permalink

    Ek is seker ons kan ‘n plan maak. Ek persoonlik dink daar moet ‘n mediese fonds gestig word met klein maandelikse premies wat vir drie jaar geen dienste lewer nie. As die kapitaal begin groei kan na fase 2 beweeg word. Die admin koste van so ‘n fonds moet feitlik niks wees nie todat kapitaal begin groei en dienste gelewer kan word. Die grootste gevaar is om niks te doen nie. Ek glo ook dat Orania nog gaan oorloop van nuwe aankomelinge en dalk nog deur Afrkaners wat daarnatoe gedwing word.

    William.

  2. Willem Fourie 5 Julie 2018 at 01:15 Permalink

    Geagte leser,
    Al word daar besluit dat die belastingbetaler mediesesorg ondersteun, beteken dit nie dat die amptenary die diens moet lewer nie.

    Burokrasië het hulleself wêreldwyd hopeloos onbevoeg en korrup bewys. Dis beter dat mededingende, privaat klinieke die dienste verskaf (en die staatsbetaling aanvaar), sodat die pasiënt die keuse van kliniek het.

    Verder verminder dit die duur vlakke van amptenare bokant die hospitale, wat net tot die koste bydra en produktiwiteit doodsmoor.

    Mooi loop

  3. Pieter van Niekerk 9 Julie 2018 at 15:30 Permalink

    Ek en my seun bespreek onlangs die mediese sorg (of gebrek daaraan) in Suid-Afrika. Ek skets toe die volgende waarskynlike scenario oor 34 jaar wanneer hy my ouderdom is:

    Die kardioloog gee hom die slegte nuus dat hy dringend ‘n hartomleiding nodig het.

    Kardioloog: Mnr Van Niekerk, ongelukkig is die eerste opening vir dié prosedure presies 5 jaar in die toekoms.

    Seun: In die oggend of die namiddag, dokter?

    Kardioloog: Hoekom wil jy weet?

    Seun: In die namiddag het ek reeds ‘n afspraak vir die verwydering van my verstandtande wat my alle hel gee.

  4. Chantelle 15 Julie 2018 at 10:48 Permalink

    Hallo Sebastiaan.
    Baie dankie vir die artikel en eerlike kyk na jul mediese delimma. Dit is jammer om te hoor dat Orania nog nie “medies” gevestig is nie. Ek verstaan daar is ‘n fisioterapeut, oogkundige en tandarts, met die opening van jul Oramed sentrum in 2015, is dit waar? Bestaan hul praktyke nog?
    Ek werk self in die mediese veld en het 2 praktyke in die Wes-Kaap, en wil graag Orania kom besoek om moontlik daar te kom woon, maar ek sal graag my professie wil kan beoefen en mense kan help, terwyl ek steeds ‘n bestaan kan maak en my lewe in rus en vrede kan geniet saam met my mede-Afrikaner.
    Hoor graag van jou.
    Byvoorbaat dankie.
    Vriendelike groete uit die Wes-Kaap
    -Chantelle

  5. Andre Jordaan 16 Julie 2018 at 20:38 Permalink

    Beste Sebastiaan,

    Dankie, dit is iets wat my ook na aan die hart is.
    Ek stem met jou saam,seker die grootste probleem is ons swak leefstylgewoontes.

    Miskien moet ons elders kyk, op die regte plek.
    As gelowige vra ek: Wat se die bybel, wat is God se wil?

    Dit is duidelik in die Woord dat God wil he dat ons gesond moet wees.
    Die bybel spreek die onderwerp van gesondheid en genesing breedvoerig aan.
    Jesus het as prioriteit die siekes genees en die taak aan ons, die kerk, opgele.
    Jakobus 5:14 Is daar iemand siek onder julle? Laat hom die ouderlinge van die gemeente inroep, en laat hulle oor hom bid nadat hulle hom in die naam van die Here met olie gesalf het. En die gebed van die geloof sal die kranke red, en die Here sal hom oprig.
    Dit is tog baie duidelik. Tog doen ons dit nie. En nou kry ons pakslae.

    Dit lyk vir my die kerk van God het hom gewillig laat mislei om in groeperings van mengerigte organisasies te verval en is nie langer die lewende organisme wat God dit in Jesus Christus gemaak het nie. Menslike tradisie en instellings het meer belangrik geword as God se wil. Ons dink ons is slim, ons wil ons eie ding doen. En dan is ons verwaand genoeg om te bid en vra dat God ons wil moet seen. God gebruik nie dokters nie, inteendeel het Jesus die genees wat onder dokters gely het.

    Daar is vandag ‘n groot verskil tussen die bybelse beloftes en die daaglikse realiteit van die uitlewing daarvan in die samelewing. Ek dink bv. onmiddellik aan die gruwelike plaasmoorde. In skreiende teenstelling daarmee is die bybel duidelik;
    Ps 34:20,21 Menigvuldig is die teëspoede van die regverdige, maar uit dié almal red die HERE hom. Hy bewaar al sy bene: nie een daarvan word gebreek nie. Ons leef miskien met die bybel in die hand maar ons is ver van God af. Te ver dat sy Woord waarheid in ons lewens is.

    In plaas daarvan dat die kerk as prioriteit die siekes genees, leef ons met ‘n siek kerk wat God se genesing desperaat nodig het. Dit word vir my opgesom in die woorde van Thomas Aquinas, ‘n teoloog wat in die 1300’s geleef het. Thomas kom op die destydse pous af waar hy ‘n groot som geld tel. “Sien jy Thomas, die kerk sê nie meer, Silwer en Goud het ons nie”. (Hierdie woorde was gespreek deur Petrus en Johannes, twee van Jesus se dissipels toe ‘n bedelaar vir ‘n aalmoes gevra het. In plek daarvan het die dissipels die lam bedelaar genees en hy kon huistoe huppel en dans). Thomas het vir n oomblik nagedink en toe antwoord hy, “Dis waar heilige vader, maar die kerk sê ook nie meer, “Staan Op en Loop” nie”.

    Dit blyk dat predikante vandag in die algemeen ‘n onbekende en dooie Jesus Christus verkondig.
    Die rede dat die gemeente so leweloos is, is omdat ‘n lewelose predikant vir hulle preek. Bekering is egter ‘n persoonlike besluit. Die dooie kerkstruktuur sal alleenlik lewend word wanneer genoeg individue hul prioriteite regkry en die eenvoudige vreugde van ‘n persoonlike verhouding met die lewende God in Jesus Christus ken. Ons kan soos per die belofte aan die Laodicense terugkeer na God en terugkry wat ons verloor het. God wil nie ons naaktheid be-oordeel nie, Hy wil ons met Sy Glorie bedek.

    Hierin is die antwoord.

    Seenwense

    Andre Jordaan

  6. Tim Anderson 30 Julie 2018 at 18:36 Permalink

    Miskien moet ons aansoek doen vir n vrywillige gekwalifiseerde sendeling dokter aan kristelike organisasies en vriende oorsee. Hulle sal baat met ondervinding in Afrika en ons sal baat met verbeterde diens.
    Groete van ʼn Engelse ondersteuner

    T

    • Theuns 15 Augustus 2018 at 22:10 Permalink

      Tim, Dis ‘n feit dat die beskikbaarheid van mediese dienste ‘n bepalende invloed het op besluite om in ‘n dorp te gaan woon of nie…
      Tim se voorstel dit klink na ‘n definitiewe opsie om te oorweeg om te soek na ‘n vrywiliger wat dit as deel van opleiding, maar ook as uitreik sosiale betrokkenheid beskou.
      Die ondervinding en voordeel wat so ‘n dokter vir die gemeenskap sal inhou, sal vir gefokusde dokters ‘n aansporing wees?
      Sluit gratis huis/ verblyf, ‘n voertuig en telefoon in as deel van die pakket. Die pakket kan deur die Dorp/ stadraad finansier word.
      Die diens kan insluit ‘n dagkliniek vir kleiner operasies en herstel na operasies wat op bv Kimberley/ Hopetown uitgevoer word.
      De vestiging van ‘n dokter spesifiek sal deure oopmaak vr vele wyfelaars…

  7. Anoniem 1 Augustus 2018 at 09:57 Permalink

    Hierdie is bietjie van die voorwerp af maar ek wil dit tog noem

    Daar is ‘n tyd en ‘n plek vir westerse medisyne en dit is seker gegewe. Maar ons as mens het ons afhanklik gemaak daarvan, en ek wil graag weet hoekom?

    Moet asseblief nie my kop af byt nie, maar het ons almal vergeet van ‘n wonderlike God, wat vir ons wonderlike kruie gegee as medisyne.

    Het ons vergeet dat ons ook ‘n verantwoordelikheid het om ons eie liggame rein te hou vir God.

    Het ons nie begin lewe met ‘n 99% tot 1% verhouding met God nie, waar ons verwag dat God 99% moet gee maar ons wil net 1% gee en is dit nie hoekom ons siek word vandag nie.

    Die loon van die sonde is tog die Dood.

    Ons wil nie meer aktief wees nie
    Ons wil nie gesond eet nie
    Ons wil nie ons harte sag maak en ander vergewe nie
    Ons wil nie on probleme uitsorteer nie en daarom verdink ons dit eerder met pille.
    Een van die eerste opdragte wat ons van God gekry het was dat ons die aarde moet bewerk en versorg, maar die mens doen dit nie hy dink hy is beter as God en hy maak vir hom afgode om te dien, Geld en rykdom en lekker lewe het ingekom en ons het begin besluit dat ons God nie meer nodig het nie, dat ons nie meer sy skepping hoef te respekteer nie, alles het begin gaan oor wie die meeste geld het, en wie die slimste is, wie die grootste huis kan bou.

    Daarmee wil ek sê dat ek graag sou wou terugkeer na God toe in ‘n plek waar die mense nog God respekteer, waar God nog inbeheer is.

    Want ek kyk na die werêld en sien net mens met sy eie begeertes en nie meer vir sy naaste omgee nie.

    Groete
    Anoniem

  8. Lida Strydom 9 Augustus 2018 at 13:05 Permalink

    Chantelle

    Dankie vir jou navraag en belangstelling in Orania. OraMed wod deur Orania Dorpsraad gefasiliteer om dit vir gesondheidpraktisyns moontlik te maak om in Orania ‘n diens te lewer. Tans is daar ‘n homeopaat, wat ook paramediese opleiding het, ‘n oogkundige, twee fisioterapeute, ‘n berader en dieetundige, ‘n chiropraktisyn (deeltyds) en twee besoekende tandartse (deeltyds) beskikbaar.Die verskillende praktyke by OraMed gaan nog volstoom voort.

    Die Provinsiale Kliniek geniet die dienste van ‘n mediese dokter,’n, verpleegkundige, besoekende arbeidsterapeut, apteker en tandartse. Die Provinsiale Kiniek is vier dae per week beskikbaar vir verskillende dienste.

    ‘n Privaatverpleegkundige het ‘n praktyk met ‘n spreekkamer en ‘n noodkamer geopen. Sy doen ook tuisbesoeke.

    ‘n Deel van die diens van Orania Veiligheidsdienste is ‘n Beheerkamer waarby ‘n noodhulpspan betrokke is en direk uitegroep kan word in geval van ‘n krisis.

    Die Orania Maatskaplike Raad bedryf ‘n tuissorgdiens waar pasiënte teen billike fooie mediese versorging in hulle huise kan kry.

    Ons dienste lyk dus ‘n bietjie anders as in die res van Suid-Afrika, maar dit is beskikbaar en dit werk.

    Die naaste hospitaal en geneeshere is 40 km van Orania in Hopetown en dus baie bereikbaar in geval van nood.

    Indien jy meer inligting oor OraMed benodig is jy welkom om ‘n e-pos te stuur aan lida@orania.co.za

    Groete
    Lida Strydom


Lewer Kommentaar

*